Í Glasgow

Það er ótrúlegt hvað það tekur stuttan tíma að fljúga frá Keflavík til Glasgow. Aðeins 1 tíma og 50 mínútur. Það er varla að flugliðarnir nái prógramminu; bera fram mat, kaffi og drykki og selja vörur. Meira mál er að vakna klukkan þrjú um nótt til þess að vera kominn í tæka tíð suður í Leifsstöð og hafa smá tíma til að slappa af í fríhöfninni og komast í smá "fíling".
Eldsnemma í morgun lögðum við leið okkar til Glasgow í kynnis- og námsferð hópur samstarfsfólks á bæjarskrifstofum Mosfellsbæjar. Til borgarinnar vorum við komin fyrir hádegi. Við búum á góðu Holiday Inn hóteli sem er miðsvæðis. Herbergin voru ekki tilbúin þegar við komum enda var enn ekki komið hádegi. Við röltuðum því um miðbæinn og fyrsta stoppið var á kránni The Gallery í Bucananstræti. Þar fengum við okkur smá hressingu. En síðan var ekki til setunnar boðið því búðirnar biðu og lá á að kynnast varningi þeirra og verði sem fyrst því tíminn skyldi nýttur til hins ýtrasta. Hópurinn tvístraðist en tveimur tímum seinna, þegar herbergin voru tilbúin, var mætt á hótelið aftur og var þá könnuð staða mála. Sumir voru tómhentir en aðrir hlaðnir pokum. Úttekt var gerð hjá þeim sem verslað höfðu og tekin skýrsla. Voru allir sammála um að þarna höfðu verið gerð kjarakaup.